Proverbs 19

1Ungcono umyanga ohamba ngobuqotho kulesiwula esilezindebe ezingcolileyo.

2Kakulunganga ukutshiseka kodwa ungelalwazi, loba ukuwalazela uze ulahlekelwe yindlela.

3Ubuwula bomuntu budiliza impilo yakhe, ikanti inhliziyo yakhe ithukuthelela uJehova.

4Inotho iletha abangane abanengi, kodwa umngane womyanga uyamfulathela.

5Ufakazi wamanga uthola isijeziso, lalowo ohutshuza amanga kayikuphunyuka.

6Banengi abazincengela ukuthandwa ngumbusi, njalo uwonkewonke ngumngane walowo ophanayo.

7Umyanga uhlanyukwa yizihlobo zakhe zonke, pho abangane bona bamnina kangakanani! Lokuba ebabelesela ebancenga, ngeke esabathola.

8Lowo ozuze ukuhlakanipha uthanda umphefumulo wakhe; lowo ogogosa ukuzwisisa uyaphumelela.

9Ufakazi wamanga uthola isijeziso, njalo lowo ohutshuza amanga uzabhubha.

10Kakusifanelanga isiwula ukuthi sihlale enothweni – kubi kangakanani ukuthi isigqili sibuse amakhosana.

11Ukuhlakanipha komuntu kumupha isineke; kumupha udumo ukunganaki ukuqalwa.

12Ukuthukuthela kwenkosi kunjengombhongo wesilwane, kodwa ukuthandwa yiyo kunjengamazolo otshanini.

13Indodana eyisiwula iyamchitha uyise, lomfazi wendoda olenkani unjengamanzi athonta futhifuthi.

14Izindlu lenotho yilifa elizuzwa ebazalini, kodwa umfazi ozwisisayo indoda imphiwa nguJehova.

15Ubuvila buletha ubuthongo obukhulu, njalo umuntu owehluleka ukuzenwaya uyalamba.

16Lowo olalela izeluleko uvikela impilo yakhe, kodwa lowo odelela izindlela zikaJehova uzakufa.

17Olomusa kubayanga upha uJehova, uzakumvuza ngalokho akwenzayo.

18Qondisa indodana yakho, ngoba lokho kuzayisiza; ungabi lengxenye yokuyibulala.

19Umuntu ololaka oluphuphumayo luyamtshayisa, ungamlamulela, usuzahlala umlamulela njalo.

20Lalela ukucetshiswa, wamukele ukuqondiswa, ngoba ekucineni uzahlakanipha.

21Inhliziyo yomuntu igcwele amacebo amanengi, kodwa yisimiso sikaJehova esimayo.

22Umuntu uloyisa uthando olungaqamukiyo; kungcono ukuba ngumyanga kulokuba lamanga.

23Ukumesaba uJehova kuholela ekuphileni: Onjalo uhlala esuthisekile, engathintwa yizinhlupheko.

24Ivilavoxo litshonisa isandla emganwini, liyehluleka ukuphakamisa lokho kudla lidle.

25Thela uswazi isideleli, abathobekileyo bazafunda ukuhlakanipha; khuza umuntu oqedisisayo, uzazuza ulwazi.

26Lowo ontshontshela uyise, axotshe unina yindodana ethelela inhloni lehlazo.

27Uma uyekela ukulandela izeluleko, ndodana yami, uzalahleka utshiye amazwi okwazi.

28Ufakazi oxhwalileyo uyawudelela umthetho, lomlomo womubi uminza ububi.

29Izijeziso zilungiselwe izedeleli, loswazi ngolwemihlane yeziwula.
Copyright information for NdeIBE